چوری شدہ بینٹلی پاکستان کیسے آئی؟

 چوری شدہ بینٹلی پاکستان کیسے آئی؟

ذرائع کے مطابق، انتہائی مہنگی گاڑی "Bentley Mulsanne" کا آرڈر ایک سفیر نے وزارت خارجہ کی منظوری سے پی ٹی آئی کے دور میں دیا تھا۔

کراچی کے علاقے ڈیفنس ہاؤسنگ اتھارٹی (ڈی ایچ اے) کے ایک گھر سے برآمد ہونے والی چوری کی گاڑی کی تحقیقات اس وقت جاری ہیں۔

ذرائع کا کہنا ہے کہ گاڑی کو وزارت خارجہ کی جانب سے لکھا گیا خط موصول ہونے کے بعد محکمہ کسٹم نے برآمد کرلیا۔

اس معاملے سے باخبر ذرائع نے بتایا کہ سفیر نے استثنیٰ سرٹیفکیٹ 6021 کے ذریعے گاڑی کا آرڈر دیا۔

وزارت خارجہ کے خط میں انکشاف کیا گیا ہے کہ سفیر کو 22 نومبر 2019 کو استثنیٰ کا سرٹیفکیٹ جاری کیا گیا تھا۔

تاہم موجودہ سفیر نے گاڑی کی ملکیت سے انکار کرتے ہوئے گاڑی کی رجسٹریشن ختم کرنے کی درخواست کی اور کہا کہ گاڑی ان کے قبضے میں نہیں ہے۔

وزارت نے اپنے خط میں کہا ہے کہ سفارت خانے نے درخواست کی کہ گاڑی کو ضبط کر لیا جائے کیونکہ اس کا غلط استعمال ہو سکتا ہے۔

ذرائع کے مطابق وزارت خارجہ کی جانب سے ابتدائی تحقیقات پر مبنی خط کسٹمز انفورسمنٹ کراچی کے ڈپٹی کلکٹر کو کارروائی کے لیے لکھا گیا۔